A eusem zwöite Tag in Calgary hemer eus uf ide Zoo vo Calgary gmacht. De Zoo isch mega schön und was richtig cool gsi isch, me isch immer mega nöch bi de Tier gsi und het sie (fast) alänge chöne… 🙂 Es het einige Tierarte gha, wo mer bi eus i de Zoo nid gseht, mal was anders 🙂
Nachem Zoo simmer zrugg i Downtown, hüt isch einiges meh los gsi als a eusem erste Tag. D’Sandra het no es Souvenir fürs ufs Sideboard i de Stube kauft (nüt 0815 – sind gspannt :P) und de simmer nochli durs ichaufscenter glofe, bevor mer is Zimmer chli go erhole sind. Zum z’Nacht simmer is Milestones grill + bar go ässe, es het Bruschetta gä zur Vorspiis zum Teile und zur Hauptspiis es Red Thai Curry Bowl es Crispy Chicken Sweet Chili – richtig fein gsi, für d’Sandra z’Beschte ässe sit sie do isch 😀
Fazit vo Calgary: 1 Übernachtig längt völlig, me hets relativ schnell gseh, es isch nid so en typischi Stadt wo di ewigs chasch vertue – sind beidi chli enttüscht. Freue eus das ez weder zrugg id Rocky Mountains goht – au wenns s’Wetter grad nid so rosig vorhergseit wird, aber velech änderet sech das ja no.
p.s. ime andere Bitrag gseht mer no de 2. Teil vo eusere Route 🙂
