S’Ziel vo dem Tag esch gsi chli en abwechslig vo de Berge zfinde, dass heisst mer send ufgstande händ euses Züg packt ond händ eus of de Weg nach Calgary gmacht 🙂 die fahrt vo Canmore nach Calgary esch ned all zu lang gange und scho nach chli meh als ere stond händ sech vor eus die höche Gebäude uf türmt, mer send denne dirket dor Stadt zu eusem Hotel gfahre – Regency Suits Hotel. Dört acho hämmer glöck gah ond grad chöne euses Zimmer bezieh. Nachere chline verschnufs Pause hämmer den gseit chom er laufe zum wohl bekannteste Merkmal vo dere Stadt de Calgary Tower. Wies de Zuefall het welle hets dört au grad es Touristebüro gah wo mer eus den met Stadtplän usgstattet händ. Do mer langsam aber secher Honger gah händ hämmer gseit chom mer gönd zrug a die Stephen Avenue und luege was es dört zu z’ässe geht. Erstunt sind mer den gsi, wo mer gseh händ das es Resti geht wo jedes Menu anschiendend nor 5.95 CAD chostet. Do es leider dosse kei Platz gah het, hämmers eus ofem Bänkli vorne dra bequem gmacht und ghofft das gli öber zahlt und goht. 😀 Nach ned mol 5 min esch da au de Fall gsi. De Dominik esch grad ufgstande ond het de Platz welle go reserviere, aber wies halt in Kanada so esch, wersch du vo de Servicelüüt platziert und vor eus send grad zwöi Fraue ine gange ond mer händ denkt ou nei schad, jetzt esch de Platz dosse vergeh an die. Um so erstunter simmer gsi wo Servicefachfrau zu denne Dame gseit hät nei de Platz sigi reserviert für die beide 😀 Mer händ eus beid komisch a gluegt ond denkt WOW die esch aber ufmerksam, dass die das checked het das mer dört of de Tisch warte 😀
Nachemne feine Burger und Nachos wo wörklich em Pris vo 5.95 CAD pro Menu enstsproche händ send mer den of de Calgary Tower. Die Ussicht esch de Wahnsinn gsi, mer händ bis zu de Rocky Mountains gseh. *-* Nach dem kurze abstächer uf de Turm hämer eus gseit gah mer erkunde Stadt jetzt z’fuss. De Weg het eus den zu de National Library gführt, vo dört her witer nach China Town zum Eau Clair Market und zum Schluss in Price’s Island Park. Dört hämmer den för es momentli d’rueh i de schöne Wiise gnosse 🙂
Nach dere Erkundigstour händ sech die Trapaze vo de letzte Täg chli bemerkbar gmacht und mer send is Hotel eus chli go erhole. Geg de obe hend mer eus nomol ufgrafft (eigentlich well mer Lust of es Subway Sandwich gah händ ^^) und send nomol nach Downtown glofe. Komischerwiis mache unter de Woche alli Läde am 6i zue, de hämer eusi Tour chli müesse uswite ond zum witerentferte Subwaylade laufe 😀
Nach dem guete Sandwich het eus den nomol d’Lust packt uf de sogenannti Scotman Hill zlaufe. Achtung das esch en chline Geheimtipp, de findet mer eigentlich i keim Blog oder Reiseführer. Sandra het der per Zuefall ofemne private Reiseblog entdeckt. Dört acho hämmer nor denkt WOOW. Dor dass das de Scotman Hill chli höcher gläge esch, hät mer of Skyline vo Calgary abe gseh ond dor da das Sonne am Untergo gsi esch, het da hammer Föteli geh 😀 Sogar au eis, zwöi romantischi 😀 Nachdem wonderschöne Abschluss hämmer eus den of de Weg zrug is Hotel gmacht. 🙂
