Hüt hemer eis Ziel gha, uf de Sulphur Mountain z’laufe 😀 Am Morge früh simmer los, zum no bi agnehme Temperature dobe azcho.. also am 8.15 Uhr simmer bim Parkplatz vo de Banff Gondala gstartet – de Dominik het grechnet, das mer öppe 4h hend mit de Sandra… das mer pünktlech zum z’Mittag dete sind 😀 Er het aber d’Sandra mit de Wanderstöck unterschätzt (die wür sie nümme hergä) – denne sie isch fast dete ufegsecklet (emu für eres Tempo schüsch wenns de Berg ufegoht)… nach 5km het ihre die rechti Schultere (Handtäsche-Schultere :D) avo weh mache und well de Dominik ja gern d’Heruseforderig het, het er ihre Rucksack no die letzte 500m treit.. debi isch eus es anders Päärli entgege cho und er het zum Dominik gmeint „I did the same yesterday“ – die arme Manne, aber für das liebe mer sie ja <3 😀
Nach 1 Stunde, 53 Minute, 5.5km und 650HM simmer uf 2451m acho, glücklech und nid mal so kaputt 😀 Denne hemer euses mitgnohige Z’Morge gässe, Facetime mit eusne Liebste dihei gmacht und d’Ussicht gnosse. Nach eme Kafi im Restaurant ischs weder zrugg gange, au das simmer glofe und i 1 Stund 22 Minute weder ufm Parkplatz acho. Cooli Wanderig gsi!
Zur Erhole simmer denne chli an Lake Minnewanka – Füess bade und Sunne gnüesse.. eifach schön die See i de Berglandschafte! Zum z’Nacht hets eu de weder is Dorf Banff zoge, zerst chli Souvenirs shoppe und denne hets es Steak (recht geils, gemäss sine Wort) für de Dominik und Salat und Knobli-Brot für d’Sandra gä.
Zum Abschluss vom Tag simmer ine Hot Spring (heissi Quelle) – grossi Erwartige mit ere chli ere grössere enttüschig. Es Becki vo de grössi 25m uf 10m und gfühlti 100 Lüüt vo x verschednige Natione.. Nach 30 Minute und 8.30CAD pP ärmer simmer denne zrugg is Hotel – aber immerhin hemer au das erlebt. 😀
Murn gohts ab uf Calgary, zwe Täg Sightseeing – mal was anders, mer freue eus 🙂
btw – mer üebe immer no mit de GoPro 😀