Höt esch euse letzti volli Tag in Kanada ond de het wie üblich a gfange. Nachdem mer för eusi Verhältnis usgschlofe händ, send mir go zmorge esse 🙂
Nachdem mir eus stärkt händ, hämmer euse Rucksack packt und händ eus of de weg zum Canada Place gmacht. Well euses Hop on Hop off Ticket no 2h gültig gsi esch,
sind mer nomol schnell of de Bus well mer no paar schöni Föteli vo de Lions Gate Bridge händ welle mache.
Aschlüssend sind mer bem Canada Place ufs Wassertaxi wo eus of die ander Site vo Vancouver brocht het. Vo dört sind mir denne in Bus i gstiege wo eus vom Lynn Canyon brocht het.
De Lynn Canyon esch en super Alternative zum Capilano Park, dört zahlt mer nämlich 60 CAD itritt zum über d’Hängebrugg laufe. Bem Lynn Canyon gehts au so ne Hängebrugg, eifach chli chliner aber deför gratis 😀 Es het guet do nach so vellne Täg mol weder d’Natur dörfe gnüsse.
Am spötere Nomitag sind mer denne met de U-bahn zu de Station Metrotown gfahre wo mer eus imene riese grosse Shoppingcenter verwillet händ.
Wells euse letzt Obe in Kanada gsi esch, hämmer denkt gömmer nomol schön go esse und nach dem Vegi Vorfall vom Vortag het sech de Dominik für es Steakhouse
entschiede. Nachemne sehr feine Znacht sind mer denne hei ond händ no Online ichecket für de Heiflug. Bem ichecke esch eus denne ufgfalle das sie euse Flug
vo 16:00 of 20:40 verschobe händ. Das het eus recht a gschisse well mer eigentlich für de 25.6 nöm vell planet gah händ und jetzt nomol en ganze Tag müend ome bringe.
