Mit dem hütige Tag endet euses Reis i de Nationalpärk Banff und Jasper. Bevor mer sie aber ganz verlönd het eus Sherill (Gastmuetter) no en super Tipp met ufe weg geh und zwar das mer of eusere Reis rechtig Clearwater doch no sölle en halt dem Mount Robson mache. Er esch mit knapp 4000 Meter de höchsti Berg i de Rocky Mountains. Nach ere Stund fahrt hämmer de Berg bereits vor eusne Auge gah. Nachemne chorze Stop im Visitor Centre, sind mer denne zum Parkplatz gfahre und eus uf de guet 5Km langi weg zum Kinney Lake gmacht. De weg esch alles entlang emne Fluss gange was die wanderig no recht attraktiv gmacht het.
D’obe a cho hämmer eus den chli am See erholt, eusi Füess bädelet ond chli die rueh gnosse. Aschlüssend hämmer eus denne weder of de Rückweg zum Auto gmacht 🙂
Nach witere 2.5h Autofahrt sind mer den is chline Dörfli Clearwater cho. Es esch wörklich es chlises Dörfli ond bietet abgseh vom See ned sonderlich viel. Es giltet als Gateway zum Wells Grey Nationalpark welle mer den morn gönd go a luege. Als mer denne zum Hotel gfahre send, händ mer eus beid komisch gluegt ond denkt, scheisse wo send mer den do glandet? Wo mer aber de Schlüssel für euses Zimmer entgege gno händ, sind mer positiv öberrascht worde. Euses Zimmer esch wörklich dirket am See ond d’Ussicht esch de hammer. Au s’Zimmer selber gseht ganz guet us.
Wo mer all eusi Sache deponiert gah händ esch den de Dominik no chorz i de See gumpet zum sech en abchüelig zgönne. Aschlüssend sind mer den is Zimmer pnd händ eus ready gmacht fürs Znacht. Die Frau a de Reception het eus s’Restuarant „Painted Turtel“ empfohle. Dört acho hets of de ersti Blick super usgseh, mer händ au grad no en Plätzli of de Sonneterrasse becho :).
Leider het de Kellner ned so überzügt ond mer händ fast en Stond uf euses Esse müesse warte. Er het sech deför mehrmols entscholdigt und eus sogar no Getränk offeriert. Kurz drufabe send mir den zrug is Hotel ond send go pfuuse.
