Hüt isch ufm Programm gstande, mal usz’schlafe 😀 Irgendwie simmer de aber glich scho vor de 8ne wach gsi. Z’Morge hemer i eusem Guesthouse gässe und när simer is Städtli glofe und hend es zwöi Bike gmietet. Es E-Bike wär 80 CAD für ei Tag gsi, das isch de Sandra z’tür gsi also het sie sech sit Jahre weder mal für es Bike ohni Motor entschide & los ischs gange.
Zerst hemer de Old Fort Point agfahre, gemäss Bike Map hemer gmeint es sind alles so Strössli – schlussendli sinds Waldwege und richtige Trails gsi – eigentli ja geil, nur nid ganz so geil well mer es Hardtrail gha hend 😀 Uf em Ussichtspunkt acho, simer zrugg a d’See „Anette und Edith Lake“ und hend d’Ruhi gnosse… ufm Rückweg is Städli simer de Strass entlang gfahre oder eher gstande? 😀 es isch so windig gsi und d’Sandra het so z’kämpfe gha (ere het eifach de Motor gfehlt) das de Dominik z’Gfüehu gha het, er gheit ez de grad um, wells so langsam gsi isch 😀 Trotzdem simmer de im Städli acho, hend euse Wassertank gfühlt und sind no richtig Patricia Lake ufegfahre.. de Dominik topfit, d’Sandra eri Bei hend nüm möge.. Trotz allem hemer de au no die 4km gschafft und es het sech glohnt, d’Abfahrt isch en schöne Trail gsi! Dunde hemer euses Bike nach 32km Fahrt weder zrugg gä.
Zrugg id Unterkunft, Badzüg packt und de simmer wieder ine Hot Springt, 1h entfernt vo Jaspar.. üse Gastmutter het gmeint, sig mega schön und viu anderst als in Banff (dete simmer ja enttüscht gsi)… naja, so viu anderst ischs au nid gsi.. zwar meh Beckine und grösser, aber trotzallem au viu z viu lüüt – 30min bädelete und entspannt im 40Grad Wasser – und de ischs weder zrugg gange. Ufm Heiweg hemer no churz de Pyramid Lake bsuecht (de hemer mitm Bike nüm gschafft) und de ischs ab id Unterkunft.
D’Hälfti vo eusere Reis isch um, murn gahts ab nach Clearwater – mer mached en Stop mit Wanderig bim Mount Robson (höchste Berg vo de Rockies) – het eus au d Gastmutter empfohle. Ab murn hemer de weder 9h Ziitunterschied.
