Für de hütig Tag hemer eus paar Sache usm Reiseführer & Tipps usm Internet usegsuecht und sind los. Vom Hotel sinds ca. 4km zum „Old Strathcona Farmers‘ Market“ im Stadteil Old Strathcona gsi wo mer z’Fuess glofe sind.. isch en Essens- und Waremarkt wo all Samstig stattfindet – immer interessant so was ime fremde Ort z gseh 🙂 Mer sind dur de Märt dureglofe und hend es zwöi enart „Luxemburgerli“ kauft – nid z’vergliche mit de Original vo Sprüngli 😀
Wiiter simmer chli dur de Stadtteil gschländeret bis zume Flohmärt / Brockehuus (da hät natürli nid dörfe fehle mit de Sandra) – agschribe ischs gsi mit die gröschti Antiquitäte-Mall in ganz Westkanada – arme Dominik! Es isch würkli en Art Brocki gsi, eifach riesig.. de Dominik het sech nur gfragt ab all dem „Grümpel“ und d’Sandra het nur Auge für d’Modellautos und co gha (das bringt ja au Geld!).. Wenn d’Sandra en leere Koffer hätti, wär ez de halbi voll mit Modellauto – es het so viel gha und „günstig“, wo bis eus tüür hättsch chöne verchaufe.. 😛 De Dominik isch de aber au froh gsi wos denne weder usegange isch und nid die ganz Brocki ikauft wurde isch (nur es chlises Mitbringsel für de Papi vo de Sandra :)).
Es isch wiitergange dur en Park, wo mer hätti selle uf Skyline vo Edmonton gseh – mer hend nur Bäum gseh.. entweder am falsche Ort oder falsche Tipp 😀 Aschlüssend simmer zu en art Pyramide glofe, gnannt „Muttart Conservatory“, au dete hätti mer selle en schöne Blick uf Skyline ha, naja.. es het aber au avo regne.. denne ischs zrugg zu Downtown gange, zur Sir Winston Churchill – au das enttüschend, irgendwie.. 😀
Z’Beschte am ganze Tag (neb em Flohmärt für d Sandra) isch denne s’ässe gsi, eigentli hemer weder zum Inder vom Vorabig welle, sind de aber ame andere „India Fresh Food“ verbi glofe und es het eus det inne zoge.. me het d’Tellerart chöne entscheide (2, 3 oder 4-teilig) und was mer nebst de Bilag als Hauptgricht hät welle.. rise Portion für en faire Priis! 🙂
Gnueg gässe ischs denne zum Auto gange und ab nach Jasper, 4h Autofahrt isch ufm plan gstande, so zemli eifach alles gradus.. 🙂 In Jasper simmer i eusem GuestHouse acho – Seldom In Guest House – und super nett empfange wurde. Mer hend euses chline herzige, super subere Zimmer bezoge und Sie het eus no Insider-Tipps gä für de Ufentahtl in Jasper-Umgebig (sie het mehreri Jahr im National Park gschaffet!) bevor mer denne müed is Bett gfalle sind – murn sells früh usm Huus go!
