Nachdem mir gestert erfahre händ das euse Flug jetzt spöter goht, hämmer eus öberleiht was mer bes am 4i no chönte mache. Das het sech als sehr schwerig usegstellt well mer
eigentlich wörklich alles gmacht händ wo sech lohnt zum mache. Nachem z’morge und em uschecke hämmer eus denne deför entschiede no die bekannti Robson Street derab zlaufe.
Das esch so die Shopping Meile in Vancouver. Mer send denne allerdings erstuunt gsi das mer nach 1.5h scho die ganze Stross gseh gah händ.
Nachere chorze überlegig, het den de Dominik gseit chom mer laufe nomol of Granville Island und gönd dört go zmittag esse.
Währendem esse, het Sandra denne gseit, sie heig no vomene schöne Park im südliche Teil vo Vancouver ghört. Nach churzem google hämmer eus denne entschiede d’U-Bahn zneh ond händ eus of de Weg zum Queen Elizaneth Park gmacht. Das het sech wörklich no glohnt. Well de Park mit all sine Blueme mega schön gsi esch.
Nachdem mir eus denne zrog rechtig Downtown gmacht händ esch es langsam zit worde sech vo Vancouver und Kanada zverabschiede. Mer send zrugg zum Hostel händ euses Gepäck gholt ond händ eus uf zum Flughafe gmacht. Dört a cho händ mer relativ schnell chöne euses Gepäck ufgeh. Sandra het metemne Gwicht vo 22.7 KG fast s’Maximum a Gwicht usgschöpft 😀
Nachdem mir alles ufgeh händ, sind mer denne no is Outlet Center gange wo neben Flughafe gsi esch. Dört hets wörklich sehr schöni Markesache zumene Bruchteil vom ursprüchliche Verchaufspris gah. Leider eifach ned i eusere Grössi 🙁
Mer send denne am Flughafe no öpis chlises go esse und händ euse Blogiträg aktualisiert, bevors am 20:30 gheisse het Boarding.
A eusem Platz abgsässe esch es denne 15 Min spöter au scho los gange. De Pilot het eus Willkomme gheisse und de Flüger ofe Weg rechtig Züri brocht.
Mitemne letzte Blick usem Fenster ond de wonderschöne Obesonne händ mer eus vo Vancouver und Kanada verabschiedet.
