Eigentli isch de Plan vo hüt gsi, das de Dominik nomol 4h ufs Bike goht und d’Sandra chli usruhit, zum See hindere lauft (wo de Dominik am bike isch) unds denne dete es Picknick git :).. so het sech de Dominik id Bike-Klamotte gworfe und zäme simer no is Dörfli go z’Morge ässe… Währendm Esse het de Dominik gfunde, sini Bei möge irgendwie au nid so und churzerhand hemer weder euse Plan übere huufe grührt und hend eus entschide, mit de Gondle uf de Mountain Whistler ufezgo 😀
Also zrugg is Hotelzimmer, anderst agleit (anschinend sigs det obe chalt :D) und los ischs gange mit de Gondle uf de Berg. 25 Minute het die Fahrt dured und me het uf Downhill-Strecki abe gseh (zum Teil ja gstört :D), dobe acho simmer eifach mal alne andere noglofe, ohni z’wüsse wohes überhaupt goht.. 😀 Es isch weder mal eifach alles (steil) ufegange und d’Sandra het bitz gjömmerlet.. langsam simmer gnue gwanderet 😀 Dobe acho, hemer de euses plante Picknick vom See gmacht, schön gsi 🙂
Denne ischs zrugg gange zur Bergstation, hend d’Peak zu Peak Bahn gnoh (en Gondle wo zwe Berge verbindet), sind uf en andere Berg übere, dete im Kafi was trunke und weder abe is Dorf. I dem moment hemer usegfunde das Whistler ja viel grösser isch das wo mer bis ez kennt hend 😀 Bis jetzt simmer nur im Center VIllage gsi, es git aber no es Upper Village und North Village 🙂 So simmer also nochli dur d Läde glofe, Mitbringsel ikauft und denne zrugg is Hotel, chli go usruhie!
Spöter weder zrugg is Dorf hemer en Apero (Bier & Sangria) bi de Downhill-Strecki gnoh und denne chli zuegluegt 🙂 Zum z’Nacht hemer eigentli weder zume Inder welle (well mer da beidi gern hend – und da gits selte das mer s gliche gern hend :P), unterwegs hemer de kurzerhand für en anders Resti mit ere schöne Sunneterasse entschide. Thai Curry für d’Sandra, Fish & Chips für de Dominik – und zur Vorspiis weder mal XXL Nachos (wie mers nid wüsste das d Vorspise e Hauptspiis für zwe lüüt wäre!).
Während em Esse hemer no es Telefon becho, das eusi buechti Whale Watching Tour leider abgseit wird, wells murn abig sehr stürme sell. Uf die eint Siite ja super, dass Sie druf luege und nid eifach dureführe wegem Geld, uf de ander siite müemer ez luege wenn mer chönd go Whale Watche 😀
