13.06.2019
Ohni Wecker simmer weder ufgwacht churz vo de 8ne – bi dem Plastikbett het mer au nid chöne schlafe, jedes mal wenn sech öpper dreiht het isch mer wach gsi :D. Euses Züg weder zämepackt und los ischs gange. Hüt isch de Wells Gray Provincial Park bi Clearwater ufm Plan gstande. S’bsundere a dem Park selle d’Wasserfäll si, es het en paar und die hemer welle go aluege 🙂
D’Stärkig hemer eus im Ichaufslade gholt, en Pizza-Bretzel, es Müesli, Orangesaft und de ischs los gange zum 4. höchste Wasserfall vo Kanada. En Trail vo 4km (ei Weg) het eus zum Wasserfall vo 176m tüfi gführt, nur wenigi hend de Trail gmacht – well uf desere Siite vom Wasserfall het mer chöne mitm Auto hefahre 😀 De Trail isch trotzdem gmüetli gsi und d’Sandra het mal eri Trail-Run-Schueh zum Isatzbracht, Sie isch zum Teil jogged, de Dominik het sie atribe 😀 Dur das hemer die ganze 8km i 1h 45 Minute gschaffd 😀 Mitm Auto ischs de wiiter gange, eigentli hemer an See welle und Kanu fahre, zum See ufe isch d’Strass aber immer schlechter wurde das mer de umkehrt hend – zum Glück, well paar Minute spöter hets avo gwittere und regne… ufm Rückweg hemer no zwe anderi Wasserfäll i dem Park gmacht.
Um die 14.00 Uhr hemer eus denne de weg uf Kamloops gmacht, letzti Zwüschenstopp vor Vancouver. D’Fahrt het ca. 2h dured und de simer in Clearwater acho, 32 Grad ischs gsi und sehr tüppig. Mer hend euses Hotel bezoge und sind denn is Downtown es Restaurant go sueche: Wings für de Dominik und Thai Chicken Bowl für mich.
Murn gahts ab uf Vancouver – die wiitere Täg und Plän sind im andere Blogbitrag z finde: Unsere Route – Teil 3
