Nid ganz so früh, aber au mitm Wecker hüt 6.30 Uhr simmer los. Zerst weder i de Bäckerei ideckt und denne ischs ab an Maligne Canyon gange. Weder die erste ufm Parkplatz hemer eus für die grossi Tour entschide vo knapp 7km, wobi die erste 5km recht entüschend gsi sind und nid meh als en gmüetleche Morge Spaziergang im Wald, ganz allei ohni anderi Touriste. Für die letzte 2km simmer de aber glich no recht guet belohnt wurde, dur da dass de Canyon i sire Form doch no recht idrücklech gsi isch.
Mitm Auto ischs de wiiter am Medicine Lake verbi gange, wo mer vo wiitem de ersti Bär gseh hend, nach wiitere 30min Autofahrt simer bim Malgine Lake glandet. Dete hemer en chlini Tour vo 3km gmacht, am See entlang und dur de Wald zrugg.
E bitz müed vo de letzte Täg simmer denne uf de Rückweg. Ufm Rückweg hemer nomol zwöi Bäre gseh – dank em Schiebedach hemer sie relativ guet chöne fötele. Bim einte het de Dominik z’Gfüehu gha er het müesse usstiige und ne vom Strasserand go fötelet.. wo’d Sandra in Rückspiegel luegt, chunt de Dominik z seckle – de Bär het ufghört ässe und ufgluegt, do isch de Dominik verschrocke 😀
Zrugg i eusem Homestay acho het eus denne die liebi Sherill (Gastmutter) mit huufe Informatione für de kommendi Tag versorgt bevors denne mit eusere Dreckwäsch ine öffentlichi Wöscherei gange isch. Für d’Sandra es Erlebnis, het sie no nie gseh.. 😀 Mer hend euses züg gwäsche, es Kafi trunke & Cookie gässe und nach 1h isch alles fixfertig gsi. Mer sind chli dur Jaspar glofe, Souvenirs agluegt und kauft und zum Abschluss vom Tag i „Jasper Brewing & Co.“ go ässe: Nachos, Salat & Burger.
Für de Tag murn simmer eus no bitz unschlüssig, well s’Wätter momentan au nid weiss was es will.. zudem isch d’Hälfti vo eusere Kanada-Reis scho dure, wied Ziit lauft!
