Am Morge früh ufgwacht (well emer no ke Store wos Zimmer dunkel macht) und es het gschneit und schneit immer no… 0 Grad.. was mache mer mit dem Tag? Hemer eus gfragt… Ursprünglech hätte mer welle über de Icefield Parkway hüt fahre bis nach Jasper, aber bi dem Wetter und mit Sommerpneu? Eher nicht.. Es hätti au en Weg rundume gä, wär aber 7.5h dured und de wär no d’Option gsi vo de ganz Tag i de Unterkunft z blibe und en ruhige Tag z mache – da isch de aber relativ schnell gsturbe wo mer ke Strom meh gha hend.. Spöter hemer de Erfahre das en Baum uf d’Stromleitig gheit isch.. 😀
Vo Jasper her wär plant gsi ei Tag / Nacht nach Edmonton go, de isch eus d’Idee cho, mer chönte Edmonton ja vorzieh (4.5h Fahrziit, emu besser als 7.5h) und dank Booking und de Kostelose Stornierg vo de Unterkunft isch da ja au liecht möglich – also hemer eusi Route weder mal umplant, hend euses züg packt und sind los vo Lake Louise nach Edmonton. Zum Teil ischs schreklech gsi z’fahre.. es het mega gschneit, me het nüt gseh und isch gförhli gsi.. wo mer de us de Rockies usegsi sind hets eifach nur no gregnet.. vo dem her de perfekti Tag für so en langi Autotour, was hettsch schüsch welle mache.. 😀
In Edmonton hemer zerst es riese Ichaufscenter agfahre – Edmonten West Mall – bis 2004 z’gröschte Ichaufscenter vo de Welt gsi.. es isch würkli riesig, mit u viel Läde, Galaxyworld, Waterworld, etc… Hend dete chli ziit verbracht bevor mer de nach Downtown Edmonton gange sind und euses Hotel – Coast Edmonton Plaza Hotel by APA – bezoge hend.. eis vo de schönste Hotel bis jetzt uf eusere Reis inkl. Dusch-WC Closomat 😀 Zum z’Nacht hets indisch gä (tripadvisor sei dank) – sehr fein gsi, seit sogar d’Sandra 😀
Murn gits en Tag Sightseeing in Edmonton bevors denne am Abig nach Jasper goht.
