I de Nacht uf de 4. Tag simmer am morge am 5i vore offizielle Notfallwarnig vom Bundesstaat Alberta gweckt wurde – es grüsch wo mer beidi no nie ghört hend und verschrocke sind – eusi iPhones hend gmeldet, das 4.5 Autofahrt-Stunde vo eus en Mutter eri 3 Chind entführt het und me doch sell luege ob mer das Auto iwo gseht… 😀 Mer hend de nomol chli versuecht z’pfuuse bevors am 8i los gange isch, zerst was z’morge ässe, denne bäre spray go chaufe (jetzt simmer gwabnet für d bäre!) und denn ab in Banff Nationalpark, 15min vo Canmore entfernt.
De Dominik het de Johnston Canyon usegsuecht, mitm Parkplatz hemer grad no glück gha und de ischs los am Canyon entlang ufwärts, a de Wasserfäll verbi bis 5.9km spöter (und 450HM) bi de entstehig acho sind! Dete es churzes Päusli und denne weder alles zrugg, gsamthaft 12km simmer unterwegs gsi! I de zwüscheziit hemer au de morgig Tag planed (Banff Gondola) und entschide, dass mer die 5.5km und 650HM au wandern bewältige und uf d Bahnfahrt (65 CAD / Person für 8 Minute fahrt) verzichte. Bim Heiweg vom Canyon simmer churz dete verbi gfahre, dass mer gseh hend, wie steil dass de ufegoht, phuuu het d’Sandra denkt 😀
Bevors denne is Städli Banff gange isch hemer no en churze Abstecher gmacht an Cascade Ponds See, perfekt zum gnüesse und grilliere 🙂 Mer sind aber zrugg uf Banff, sind durs Städtli glofe, hend ersti Souvenirs kauft und schlussendli im Old Spaghetti Factory glandet wos eimol Lasagne für de Dominik & Pesto Penne für d’Sandra gä het 🙂
Zum Abschluss vom Tag het sech d’Sandra no es paar Wanderstöck kauft (langsam isch eres Wanderoutfit komplett, es git nur no Wanderferie!!!), so dass sie murn parat isch für de Ufstig uf de Sulphur Mountain, früh am morge gohts los! 😀 Simmer gspannt ob sechs lohnt… 😉
