Nach ere Nacht ime aständige Bett (nüm so quitschend!) hets es super (gratis) Frühstück gä, mit Pancake- & Waffle-Maschine 😛 Aschlüssend ab in Supermarkt, Wasser go chaufe und go Bäre-Spray sueche – leider erfolglos. Denne simmer los vo Revelstoke gfahre ganz nachm Motto „der Weg ist das Ziel“.
Unterwegs hemer a verschedene Orte aghaltet und Trails gmacht, z.B. de Hamlock Grove Boardwalk wo dur de Wald gführt het, am Start vom Trail het es Eichhörnli alli Bsuecher begrüsst 🙂 Ned wiit entfernt devo simmer im Rock Garden Trail gsi und aschlüssend no de a de Bear Falls, all die Trails sind im Glacier National Park.
Aschlüssend simmer im Yoho National Park acho und an Emerald Lake gange, ähnlich wie de Blausee bi Kandersteg. Mer hend d Laufstrecki um de See gmacht (5.3km) und d’Natur gnosse! De ersti Teil isch en normale Waldweg gsi, bim zwöite Teil ischs recht matschig gsi und mer het müesse über Baumstämm balanciere (siehe Foto :D) – d’Sandra het im Hotel grad müesse eri neue Schueh putze 😀 Zum Abschluss vo dem Tag simmer no a de Natura Bridge gsi.
Die ganz Fahrt het 3.5h duured, es het recht viel Vercher gha und mehreri Baustelle – d’Strasse sind aber mängisch schöner als bi eus :D) Zudem hend mer en Ziitzone überschrite und sind nur no 8h vo dihei entfernt 😀 Acho in Canmore hemer euses Hotel bezoge – Quality Resort Chateau Canmore – und es rieses Zimmer het uf eus gwartet, mit Cheminee. 😀
Zum Esse simmer is Iron Goat, d’Sandra het natürli weder mal nüt gschids gfunde uf de charte, also het sie zum 2te mal Nachos gnoh und de Dominik het sech en Pizza gönnt 🙂
Im Zimmer zrugg hemer eusi nächste 3 Täg plant (mer blibe ez 3 Täg in Canmore und entdecke Banff und d Umgebig) und denne müed und glückli igschlafe!
Bis murn!
