I üsere zwöite Nacht hemer doch scho bitz länger chöne schlafe, immerhin bis am 5i.. 😀 somit simmer de zum z’morge und hend paar frücht gässe (ja au de dominik en apfel :P), bevors denne los gange isch richtig Revelstoke, 2.5 fahrziit! D’Landschaft isch eifach nur WOW, d’fahrtziit goht so schnell dure wells eifach so schön isch! In Revelstoke acho hemer eusi nächsti Unterkunft für 1 Nacht bezoge – Stoke Hotel – i de nöchi vo Downtown. D’Sandra het sech i eres Wanderoutfit gschmisse (für öppis het sis ja kauft :D), de Dominik Turnschueh und die churze hose und de ischs los in Mount Revelstoke Nationalpark.
Plant wär gsi, das mer bis ganz ufe fahre und denne chli a de See spaziere, leider isch de Weg gspeert gsi und mer hend wiit unde müesse parkiere. De Plan hät eus verrote, es führt en Trail (so nenne d’Kanadier d’Wanderwege) au bis an Spitz ufe.. de erst Teil hemer in Angriff gnoh, aber schnell hemer de gmerkt das es zu lang wer (well de Nationalpark am 17.00 Uhr schliesst) und irgendwie hemer au es mumligs Gfüehu gha wege de Bäre (es sig 2 täg vorene eine gsichtet wurde – und d’Sandra wür da sicher no azieh :P).. somit simmer zrug glofe zum Auto und hend die undere chlinere Trails in Agriff gnoh, z.B. de Broken Bridge Trail.
Irgendwie simmer immer nochli kaputt vom Jetlag und dur da simmer de zrugg is Hotel, hend en chlini Pausi gmacht bevor mer is Downtown vo Relestoke gange.. s’Dörfli isch nüt gege Kelowna, relativ usgsturbe… doch es het en Cupcake lade!!! Mer hends nid chöne loh si und eus en Cupcake z’hole, 3.25CAD (umgrechnet ca. 2.45 CHF).. när hemer via Tripadvisor eus es Restaurant gsuecht und sind im „The Village Idiot“ glandet.. 😀 De Dominik het luscht uf es Steak gha und ich han en Salat gnoh, zur Vorspiis hemer eus für Nachos entschide – zum glück het eus d Serviertochter gseit mer selle nur Grössi „small“ neh.. es het also föllig glängt 😀 s’ässe isch sehr fein gsi, also z’empfehle!
Zrugg im Zimmer, hemer euse Cupcake gässe und no churz de 2ti Teil vo eusere Route umplaned / umbuecht.. 😀 Es git no en Abstecher nach Edmonton, Clearwater isch gstriche und defür gits no en Tag meh in Vancouver.. mal luege obs so blibt 😀
Murn gahts ab nach Canmore (Banff), dur de Glacier Nationalpark, Yoho, Banff… es isch so schön do!!!
